ఉత్తరప్రదేశ్ లో అధికార బీజేపీ ఏర్పాటు చేసిన ఓ కార్యక్రమం రసాభాసగా మారింది. ఈ కార్యక్రమానికి హాజరైన మహిళా కార్యకర్తలు కొట్టుకున్నారు. దీనికి సంబంధించిన ఓ వీడియో ఇప్పుడు సోషల్ మీడియాలో వైరల్ గా మారింది. అయితే, సదరు మహిళా కార్యకర్తలు ఎందుకు కొట్టుకున్నారు, గొడవకు కారణమేంటనే వివరాలు తెలియరాలేదు. నడివీధిలో మహిళలు జుట్టు పట్టుకుని మరీ కొట్టుకోవడం స్థానికంగా కలకలం సృష్టించింది. రాష్ట్రంలోని జాలౌన్ జిల్లాలో బీజేపీ నారీశక్తి వందన్ సమ్మేళన్ కార్యక్రమం నిర్వహించింది. ఈ కార్యక్రమానికి పార్టీకి చెందిన మహిళా కార్యకర్తలు పెద్ద సంఖ్యలో హాజరయ్యారు. ఇంతలో ఏంజరిగిందో తెలియదు కానీ ఇద్దరు మహిళల మధ్య గొడవ మొదలైంది. కోపం పట్టలేక ఓ మహిళ మరో మహిళ జుట్టు పట్టుకుని కిందపడేసి కొట్టడం మొదలుపెట్టింది. దీంతో మిగతా మహిళలు బాధితురాలికి సహాయంగా వచ్చారు. దాడి చేస్తున్న మొదటి మహిళపై పిడిగుద్దులు కురిపించారు.
