స్టార్ బాయ్ సిద్ధూ జొన్నలగడ్డ- అనుపమ పరమేశ్వరన్ హీరోహీరోయిన్లుగా నటించిన ‘టిల్లు స్క్వేర్’ సినిమా బాక్సాఫీస్ దగ్గర వసూళ్ల వర్షం కురిపిస్తోంది. మల్లిక్ రామ్ తెరకెక్కించిన ఈ చిత్రం తొలి రోజు 23.7 కోట్లు కలెక్ట్ చేసిన సంగతి తెలిసిందే. ఇక రెండో రోజూ కూడా టిల్లు గాడు అదే ర్యాంపేజ్ కొనసాగించాడు. ఈ చిత్రం రెండు రోజుల్లో ప్రపంచవ్యాప్తంగా 45.3 కోట్ల గ్రాస్‌ వసూళ్లు సాధించి రూ. 50 కోట్ల క్లబ్‌ వైపు దూసుకెళ్తుంది. ఇక టిల్లు స్క్వేర్ రెండవ రోజూ కూడా 20 కోట్లకి పైగా వసూళ్లు సాధించింది . ఇక ఈ ఆదివారం కూడా కలెక్షన్స్ భారీగానే ఉండే అవకాశం ఉంది. మొదటి రోజే సినిమాకు ఖర్చుపెట్టిన బడ్జెట్‌లో 50 శాతం రికవరీ చేసిన చిత్ర యూనిట్ ద్వారా అందిన సమాచారం. ఇక రెండో రోజు కూడా కలుపుకుంటే సినిమా బడ్జెట్ వచ్చేసినట్లే అంటున్నారు. అయితే ఈ సినిమా ఖచ్చితంగా రూ.100 కోట్లు కలెక్ట్ చేస్తుందని నిర్మాత నాగ వంశీ చాలా ధీమాగా ముందే చెప్పారు. ఇప్పుడు టిల్లు గాడి వేగం చూస్తుంటే త్వరలోనే రూ.100 కోట్లు కొల్లగొట్టేలా కనిపిస్తుంది. ఇక ఈ చిత్రంలో నేహా శెట్టి కూడా క్యామియోలో కనిపించి సర్‌ప్రైజ్ ఇచ్చింది. అలానే సిద్ధు తండ్రి పాత్రలో మురళీధర్ గౌడ్ మరోసారి అదరగొట్టేశారు. ఇక మురళీ శర్మ, ప్రిన్స్ కీలక పాత్రల్లో మెప్పించారు. సితార ఎంటర్‌టైన్‌మెంట్స్, ఫార్చూన్ ఫోర్ సినిమా బానర్లు కలిసి ఈ చిత్రాన్ని నిర్మించాయి. భీమ్స్ సిసిరోలియో బ్యాక్‌గ్రౌండ్ స్కోర్‌ అందించారు. రామ్ మిరియాల, అచ్చు రాజమణి కలిసి మ్యూజిక్ ఇచ్చారు. ఇక ఈ సినిమాలో టిల్లు చెప్పిన కొన్ని డైలాగ్స్ థియేటర్లో టపాసుల్లా పేలాయి. ఇక తనదైన డైలాగ్ డెలివరీ, మాడ్యులేషన్, ఎక్స్‌ప్రెషన్స్‌తో మరోసారి సిద్ధూ మ్యాజిక్ చేశాడనే చెప్పాలి. . ఈ సినిమాకి అనుపమ పరమేశ్వరన్ అందాలు మెయిన్ అట్రాక్షన్‌గా నిలిచాయి. సినిమాలో లిప్‌లాక్‌లు, రొమాంటిక్ సీన్లతో అనుపమ-సిద్ధు ఓ రేంజ్‌లో రెచ్చిపోయారు. టిల్లు స్క్వేర్ ని ప్రేక్షకులు ఆదరిస్తుండటంతో పార్ట్ 3ని కూడా మూవీ టీమ్ అనౌన్స్ చేసేసింది. టిల్లు క్యూబ్ అనే టైటిల్ దీనికి పెట్టాలని మూవీ టీమ్ ఆలోచిస్తుంది. త్వరలోనే ఈ సినిమా పూర్తి డిటైల్స్‌ను ప్రకటిస్తామని నిర్మాత నాగ వంశీ చెప్పారు. టిల్లు గాడు ఎన్ని సార్లు వచ్చినా జనాలు థియేటర్లకి వచ్చి ఆదరిస్తారని , ఆ కారెక్టర్ అందరికీ కనెక్ట్ అయిందంటూ నాగ వంశీ తెలిపారు.
