తెలంగాణ కాంగ్రెస్ పార్టీ ప్రత్యేక మేనిఫెస్టోను పార్టీ ఇంచార్జీ దీపాదాస్ మున్షీ శుక్రవారం విడుదల చేశారు. ‘ఇందిరమ్మ రాజ్యం…. ఇంటింటా సౌభాగ్యం’ పేరిట మొత్తంగా 23 ప్రధాన అంశాలతో కూడిన టీ. కాంగ్రెస్ మేనిఫెస్టోను దీపపాదాస్ మున్షి విడుదల చేశారు. మంత్రి శ్రీధర్ బాబు, ప్రభుత్వ సలహాదారుడు వేం నరేందర్, దానం నాగేందర్, రోహిన్ రెడ్డి, తదితరులు పాల్గొన్నారు. రాహుల్ గాంధీ నామినేషన్‌ కార్యక్రమంలో పాల్గొనేందుకు రాయ్‌బరేలి వెళ్లిన కారణంగా సీఎం రేవంత్ రెడ్డి ఇందులో పాల్గొనలేదు.
తెలంగాణ రాష్ట్రానికి ప్రత్యేక హామీలు ఇవే
- హైదరాబాద్ మహా నగరానికి బీజేపీ ప్రభుత్వం రద్దు చేసిన ఇన్ఫర్మేషన్ టెక్నాలజీ అండ్ ఇన్వెస్ట్‌మెంట్ రీజియన్ (ITIR) ప్రాజెక్ట్‌ పునఃప్రారంభం.
- ఆంధ్రప్రదేశ్ పునర్వ్యవస్థీకరణ చట్టం – 2014 ప్రకారం..
a) కాజీపేటలో రైల్వే కోచ్ ఫ్యాక్టరీ,
b) బయ్యారంలో ఉక్కు కర్మాగారం,
c) హైదరాబాద్‌లో ఇండియన్ ఇన్స్టిట్యూట్ ఆఫ్ మేనేజ్‌మెంట్ (IIM)
d) హైదరాబాద్ – విజయవాడ జాతీయ రహదారి పక్కనుండి రాపిడ్ రైల్వే వ్యవస్థ ఏర్పాటు
e) మైనింగ్ విశ్వవిద్యాలయం
- భద్రాచల దేవాలయ అభివృద్ధికి అడ్డుగా ఉన్న ఆంధ్రప్రదేశ్ పునర్వ్యవస్థీకరణ చట్టం- 2014 ప్రకారం ఆంధ్రాలో విలీనం అయిన ఐదు గ్రామాలు ఏటపాక, గుండాల, పురుషోత్తం పట్నం, కన్నెగూడెం, పిచుకలపాడులను తిరిగి తెలంగాణాలో విలీనం.
- పాలమూరు – రంగారెడ్డి ప్రాజెక్టుకి జాతీయ హోదా.
- హైదరాబాదులో నీతి అయోగ్ ప్రాంతీయ కార్యాలయం ఏర్పాటు.
- నూతన ఎయిర్‌పోర్టు ఏర్పాటు
- రామగుండం-మణుగూరు నూతన రైల్వే లైన్ ఏర్పాటు
- నాలుగు నూతన సైనిక పాఠశాలల ఏర్పాటు..
- కేంద్రీయ విద్యాలయాల సంఖ్య పెంపు
- నవోదయ విద్యాలయాల సంఖ్య రెట్టింపు
- జాతీయ క్రీడల విశ్వవిద్యాలయం ఏర్పాటు.
- ఇండియన్ ఇన్స్టిట్యూట్ ఆఫ్ ఫారెన్ ట్రేడ్ ఏర్పాటు.
- ఇండియన్ ఇన్స్టిట్యూట్ ఆఫ్ సైన్స్ ఎడ్యుకేషన్ అండ్ రీసెర్చ్ ఏర్పాటు
- భారత వ్యవసాయ పరిశోధన సంస్థ (IARI) క్యాంపస్ ఏర్పాటు.
- నేషనల్ ఏవియేషన్ యూనివర్సిటీ ఏర్పాటు.
- ఇండియన్ కౌన్సిల్ ఫర్ మెడికల్ రీసెర్చ్ పరిధిలో కేంద్ర వైద్య పరిశోధన సంస్థ ఏర్పాటు.
- 73 & 74వ రాజ్యాంగ సవరణ ప్రకారం కేంద్ర ప్రభుత్వ నిధులు గ్రామ సర్పంచులకు నేరుగా బదిలీ.
- సౌర శక్తితో కూడిన సొంత విద్యుత్ ఉత్పత్తి వ్యవస్థ ప్రతి ఇంటికి ఏర్పాటు.
- దిగువ తెలిపిన ఇండస్ట్రియల్ కారిడార్ల ఏర్పాటు.
a) హైదరాబాద్- బెంగళూరు ఐటీ, ఇండస్ట్రియల్ కారిడార్
b) హైదరాబాద్ – నాగపూర్ ఇండస్ట్రియల్ కారిడార్
C) హైదరాబాద్ వరంగల్ ఇండస్ట్రియల్ కారిడార్
d) హైదరాబాద్ నుండి నల్గొండ మీదుగా మిర్యాలగూడ ఇండస్ట్రియల్ కారిడార్
e) సింగరేణి పారిశ్రామిక కారిడార్ ఏర్పాటు,
- సాంస్కృతిక మరియు వినోద కేంద్రం ఏర్పాటు
- మేడారం సమ్మక్క సారలమ్మ జాతరకు జాతీయ హోదా.
- డ్రై పోర్టు ఏర్పాటు.
- హైదరాబాద్‌లో సుప్రీంకోర్టు బెంచ్ ఏర్పాటు
ఇక కేంద్రంలో అధికారమే లక్ష్యంగా కాంగ్రెస్ పార్టీ వ్యూహాత్మకంగా ముందుకు సాగుతోంది. కాగా అసెంబ్లీ ఎన్నికల్లో 6 హామీల మంత్రం తెలంగాణలో ఫలించడంతో లోక్‌సభ ఎన్నికల సందర్భంగా కాంగ్రెస్ ప్రకటించిన హామీలపై రాజకీయ వర్గాలు, ప్రజల్లో ఆసక్తి నెలకొంది.
