భారత మార్కెట్లలోకి మళ్లీ విదేశీ నిధుల ప్రవాహం.. భారీగా కొనుగోళ్లు చేస్తున్న ఎఫ్‌పీఐలు
భారత ఈక్విటీ మార్కెట్లలో విదేశీ పోర్ట్‌ఫోలియో ఇన్వెస్టర్లు (ఎఫ్‌పీఐ) కొనుగోళ్ల జోరును మరింత పెంచారు. దాదాపు 10 వారాల పాటు నికర విక్రయదారులుగా ఉన్న విదేశీ ఇన్వెస్టర్లు, నవంబర్ ఆరంభం నుంచి నిరంతరాయంగా పెట్టుబడులు పెడుతున్నారు. ఈ నెల 13వ తేదీ నాటికే ఏకంగా రూ.79,301 కోట్ల విలువైన భారతీయ ఈక్విటీలను కొనుగోలు చేశారు. ఈ జోరు ఇలాగే కొనసాగితే, నవంబర్ నెల మొత్తం మీద వచ్చే ఎఫ్‌పీఐల పెట్టుబడులు ఆల్‌టైమ్ రికార్డును నమోదు చేసే అవకాశం ఉందని విశ్లేషకులు భావిస్తున్నారు.
ఈ పరిణామంపై జియోజిత్ ఇన్వెస్ట్‌మెంట్స్ లిమిటెడ్ చీఫ్ ఇన్వెస్ట్‌మెంట్ స్ట్రాటజిస్ట్ డాక్టర్ వి.కె. విజయకుమార్ మాట్లాడుతూ, "అమెరికా కాంగ్రెషనల్ ఎన్నికల్లో డెమొక్రాట్ల విజయం ఆర్టిఫిషియల్ ఇంటెలిజెన్స్ (AI) స్టాక్స్‌లో అమ్మకాలకు దారితీసింది. డెమొక్రాట్లు ఏఐ వ్యయాలు, నియంత్రణలకు అనుకూలంగా ఉండటంతో... ఇన్వెస్టర్ల నిధులు ఏఐయేతర రంగాల వైపు తరలాయి. ఈ క్రమంలో మెరుగైన వృద్ధి అవకాశాలున్న భారత మార్కెట్ వైపు గ్లోబల్ నిధులు మళ్లాయి" అని వివరించారు.
దీనికితోడు దేశీయ కంపెనీల రెండో త్రైమాసిక ఫలితాలు మెరుగుపడటం మార్కెట్‌కు కలిసొచ్చింది. 2027 ఆర్థిక సంవత్సరానికి గాను నిఫ్టీ 50 దాదాపు 15 శాతం మేర ఆదాయ వృద్ధిని సాధించే అవకాశం కనిపిస్తోంది. అలాగే భారతీయ లార్జ్‌క్యాప్ షేర్ల విలువలు ఆకర్షణీయమైన స్థాయికి రావడం, రూపాయి మారకం విలువ స్థిరంగా ఉండటం కూడా విదేశీ ఇన్వెస్టర్లలో నమ్మకాన్ని పెంచింది. ముఖ్యంగా బ్యాంకింగ్ రంగంలోని కీలక లార్జ్‌క్యాప్ షేర్లలో షార్ట్ కవరింగ్ జరగడం సూచీల ర్యాలీకి మద్దతుగా నిలిచింది.
గత వారం ఎఫ్‌పీఐలు రూ.33,340 కోట్ల పెట్టుబడులు పెట్టగా, అంతకుముందు వారం సుమారు రూ.45,960 కోట్లు ఇన్వెస్ట్ చేశారు. మరోవైపు దేశీయ సంస్థాగత ఇన్వెస్టర్లు (డీఐఐ) మాత్రం వరుసగా రెండో వారం కూడా అమ్మకాలకే మొగ్గు చూపారు. గత వారంలోని నాలుగు ట్రేడింగ్ సెషన్లలోనూ డీఐఐలు రూ.24,190 కోట్ల విలువైన షేర్లను విక్రయించారు. డీఐఐల లాభాల స్వీకరణ మార్కెట్ ర్యాలీని కొంత నెమ్మదింపజేసినప్పటికీ, ఎఫ్‌పీఐల బలమైన కొనుగోళ్లు దేశీయ మార్కెట్లకు భారీ ఊతాన్ని ఇస్తున్నాయని విశ్లేషకులు చెబుతున్నారు.
తాజా వార్తలు, బ్రేకింగ్ న్యూస్ అప్‌డేట్స్ మీ వాట్సాప్‌లో పొందండి.
