POWER OF JOURNALISM
⌂ Home
SCAN STORY
17 November 2026, 07:35 PM · నగర వార్తలుTHE DIGITAL EDITION OF Published by PJ Television Private Limited

ఇంటర్ బోర్డు రద్దుపై కవిత కీలక హెచ్చరిక.. ఏకపక్ష నిర్ణయం తీసుకుంటే ఊరుకోం!

ఇంటర్ బోర్డు రద్దుపై కవిత కీలక హెచ్చరిక.. ఏకపక్ష నిర్ణయం తీసుకుంటే ఊరుకోం!
ఇంటర్ బోర్డు రద్దుపై కవిత కీలక హెచ్చరిక.. ఏకపక్ష నిర్ణయం తీసుకుంటే ఊరుకోం!

PJNews | హైదరాబాద్ : తెలంగాణలో ఇంటర్మీడియట్ బోర్డు రద్దు ప్రతిపాదనపై రాజకీయ దుమారం కొనసాగుతోంది. బోర్డును రద్దు చేసి పాఠశాల విద్యాశాఖలో విలీనం చేయాలన్న ప్రభుత్వ ఆలోచనపై తెలంగాణ రక్షణ సేన అధ్యక్షురాలు కల్వకుంట్ల కవిత తీవ్ర అభ్యంతరం వ్యక్తం చేశారు. మంగళవారం హైదరాబాద్ సోమాజిగూడలో ‘ఇంటర్ బోర్డు రద్దు – తెలంగాణ విద్యపై ప్రభావం’ అనే అంశంపై నిర్వహించిన రౌండ్ టేబుల్ సమావేశంలో ఆమె పాల్గొన్నారు. విద్యావేత్తలు, ఉపాధ్యాయ సంఘాల ప్రతినిధులు, మేధావులతో కలిసి ప్రతిపాదన వల్ల తలెత్తే సమస్యలపై చర్చించారు.

విద్యావ్యవస్థలో కీలకమైన మార్పులు తీసుకురావాలంటే ముందుగా విద్యార్థులు, తల్లిదండ్రులు, ఉపాధ్యాయులు, విద్యావేత్తలు, కళాశాలల యాజమాన్యాలతో విస్తృత సంప్రదింపులు జరపాలని కవిత డిమాండ్ చేశారు. కేవలం పరిపాలనా మార్పులనే విద్యా సంస్కరణలుగా భావించవద్దని ప్రభుత్వానికి సూచించారు. అందరి అభిప్రాయాలను పరిగణనలోకి తీసుకోకుండా ఇంటర్ బోర్డును ఏకపక్షంగా రద్దు చేస్తే అంగీకరించబోమని హెచ్చరించారు.

విద్యార్థుల డ్రాప్ అవుట్లపై ముఖ్యమంత్రి రేవంత్ రెడ్డి చెబుతున్న గణాంకాలను కవిత ప్రశ్నించారు. పదో తరగతి తర్వాత ఇంటర్‌లో చేరేవారి సంఖ్యను లెక్కించేటప్పుడు ప్రభుత్వ పాఠశాలల నుంచి ప్రైవేట్ కళాశాలలకు, ఇతర కోర్సులకు వెళ్లే విద్యార్థులను కూడా పరిగణనలోకి తీసుకోవాలన్నారు. రాష్ట్రవ్యాప్తంగా డ్రాప్ అవుట్ల శాతం 16 మాత్రమే ఉందని ఆమె పేర్కొన్నారు.

బాలికల కంటే బాలురే ఎక్కువగా చదువుకు దూరమవుతున్నారని కవిత వాదించారు. పదో తరగతి నుంచి ఇంటర్మీడియట్‌కు వెళ్లే బాలికల శాతం 77.4 కాగా, బాలుర శాతం 68.4గా ఉందని ఆమె వెల్లడించారు. పేదరికం, గ్రామీణ ప్రాంతాల్లో బస్సు సౌకర్యాల కొరత వంటి సమస్యలు విద్యార్థుల చదువుపై ప్రభావం చూపుతున్నాయని పేర్కొన్నారు. విద్యను కొనసాగించేందుకు ఆర్థిక సాయం అందించే పథకాలను అమలు చేయాలని కోరారు.

రౌండ్ టేబుల్ సమావేశంలో జూనియర్ లెక్చరర్ల భవిష్యత్తు, సర్వీస్ నిబంధనలు, పదోన్నతులు వంటి అంశాలపైనా ఆందోళనలు వ్యక్తమయ్యాయి. ఇంటర్ విద్యను పాఠశాల విద్యాశాఖలో విలీనం చేస్తే ఉద్యోగుల పరిపాలనాపరమైన సమస్యలను ఎలా పరిష్కరిస్తారో ప్రభుత్వం స్పష్టత ఇవ్వాలని ఉపాధ్యాయ సంఘాల ప్రతినిధులు కోరారు.

ఇంటర్ బోర్డు రద్దును తాము పూర్తిగా వ్యతిరేకించడం లేదని కవిత స్పష్టం చేశారు. అయితే ఇంత పెద్ద వ్యవస్థాగత మార్పును అమలు చేయాలంటే మూడు నుంచి పదేళ్ల వరకు దశలవారీ ప్రణాళిక, తగిన నిధులు, మౌలిక సదుపాయాలు అవసరమని అభిప్రాయపడ్డారు. విద్యార్థుల భవిష్యత్తును ప్రభావితం చేసే నిర్ణయాల్లో తొందరపాటు తగదని పేర్కొన్నారు.

మొత్తంగా ఇంటర్ బోర్డు రద్దు అంశం విద్యారంగంలో కొత్త చర్చకు దారితీసింది. సంస్కరణల అవసరాన్ని ప్రస్తావిస్తున్న ప్రభుత్వం, వాటి అమలుపై సందేహాలు వ్యక్తం చేస్తున్న విద్యావేత్తలు, ఉపాధ్యాయ సంఘాల మధ్య విస్తృత చర్చలు జరగాలన్న డిమాండ్ ఈ సమావేశంతో మరింత బలపడింది.

pjnewslive.comPJ NEWS owl mark

One continuous digital clipping. Long articles make a taller image; JPG/PDF export depends on browser canvas limits.